Американскиот актер Ерик Дејн, најпознат по своите улоги во популарните серии „Вовед во анатомија“ и „Еуфорија“, почина на 53-годишна возраст по битка со амиотрофична латерална склероза (АЛС), тешка невролошка болест позната и како Лу Геригова болест.
Веста за смртта ја потврдија неговите претставници, наведувајќи дека актерот починал помалку од една година откако јавно ја објавил својата дијагноза.
– Последните денови ги поминал опкружен со своите најблиски пријатели, сопругата и ќерките Били и Џорџија, кои биле центарот на неговиот свет. За време на борбата со АЛС, тој станал силен застапник за подигање на свеста за болеста и поддршка на истражувањата, се вели во соопштението на семејството, барајќи приватност.
Ерик Дејн доби огромна популарност во средината на 2000-тите кога беше избран за улогата на д-р Марк Слоун, познат како „МекСтими“, во медицинската драма „Вовед во анатомија“. Тој играше во серијата од 2006 до 2012 година, а накратко се врати во 2021 година. Иако неговиот лик загина во авионска несреќа во заплетот на серијата, тој остави силен белег – болницата „Сиетл Грејс“ подоцна беше преименувана во „Греј Слоун Меморијал“.
Болница токму во чест на неговиот лик. Во 2019 година, тој направи целосен пресврт во својата кариера и се претстави на публиката во темната улога на Кал Џејкобс во хит серијата „Еуфорија“, која ја снимаше до неговата смрт. Борба против АЛС и јавен активизам Во април 2025 година, Дејн откри дека има АЛС, прогресивна болест која ги уништува нервните клетки одговорни за движење, говор и дишење. Според медицинските податоци, повеќето пациенти живеат помеѓу три и пет години по дијагнозата.
Актерот набрзо стана еден од најгласните активисти за подигање на свеста за оваа болест. На конференција во Вашингтон истата година, тој рече:
– Некои ме познаваат како доктор од серијата „Вовед во анатомија“, но денес зборувам како пациент кој се бори со АЛС.
Роден на 9 ноември 1972 година во Северна Калифорнија, Дејн го загубил својот татко на рана возраст, кој починал кога актерот имал само седум години. По завршувањето на средното училиште, се преселил во Лос Анџелес за да продолжи со актерска кариера. Со текот на годините, тој се појавил во бројни серии и филмови, вклучувајќи ги „Последниот брод“, „Волшебни“, „Спасени од ѕвоното“ и „X-Men: Последната битка“.
По него останале сопругата, актерката Ребека Гејхарт, и нивните две ќерки, Били Беатрис и Џорџија Џералдин.
Иако двојката се разделила во 2017 година, тие никогаш официјално не се развеле. Мемоарите на Ерик Дејн, кои сè уште не се објавени, „Книга на денови: Мемоари во моменти“, се закажани за објавување кон крајот на 2026 година.
Книгата ќе ги опфати клучните моменти од неговиот живот – од првиот ден на снимањето на „Вовед во анатомија“, преку раѓањето на неговата ќерка, до моментот кога дознал за тешката дијагноза.