Постапувањето со Кристијан Јосип Периш (32), кој почина во психијатриската болница „Свети Иван“ во Загреб, било надвор од сите дозволени протоколи, оцени судијата Ивица Веселиќ, член на Комисијата за заштита на лица со ментални нарушувања. По ненајавената посета на установата, тој изјави дека снимките од инцидентот покажуваат употреба на прекумерна физичка сила, која не може да се оправда со ниту едно правило за постапување со пациенти.
„Не постои протокол ’перница врз глава‘. Тоа е целосно надвор од кој било протокол. Не постои протокол за употреба на прекумерна физичка сила“, изјави Веселиќ во емисијата „U mreži Prvog“ на Хрватското радио.
Тој потврди дека во петокот, заедно со претседателот на Комисијата, извршил ненајавена контрола во психијатриската болница во Јанкомир, каде што престојувал Периш пред неговата смрт.
За време на посетата, членовите на Комисијата разговарале со вработените за начинот на функционирање на установата, условите за работа и третманот на пациентите. Ја прегледале и собата 11А, во која бил сместен 32-годишниот Периш.
Веселиќ посочи дека персоналот бил подготвен за соработка, но забележал дека вработените се изложени на значителен психолошки притисок. Според него, по особено тешки и ризични интервенции, здравствените работници треба да добиваат соодветна психолошка поддршка, која, според нивните сведочења, не им е обезбедена во доволна мера.
Иако Комисијата сè уште нема донесено конечен заклучок за околностите на смртта на Периш, Веселиќ нагласи дека она што може да се види на јавно достапните снимки е неприфатливо.
„Секако, во оваа фаза не можеме и нема да го изнесеме нашето конечно мислење; меѓутоа, јавноста е информирана, а снимките – кои се јавно достапни – јасно покажуваат дека била употребена прекумерна сила. За жал, сè што се случило во тој момент било надвор од утврдените протоколи“, рече Веселиќ.
Судијата, кој речиси две децении врши посети на психијатриските установи во Загреб во кои се сместуваат и пациенти задржани против своја волја, изјави дека случајот длабоко го потресол.
„Ова беше едноставно ненормална реакција, целосно неоправдана“, истакна тој, коментирајќи го постапувањето прикажано на снимките.
Според Веселиќ, законските прописи и постојните протоколи доволно јасно го уредуваат начинот на кој медицинскиот персонал треба да постапува со пациентите во психијатриските установи. Сепак, тој смета дека проблемот може да биде во нивната практична примена, како и во евентуалните недостатоци во обуката на вработените.