Израелскиот премиер Бенјамин Нетанјаху денес изјави дека дал инструкции веднаш да се започнат преговорите за ослободување на сите заложници во Газа, а во исто време да се работи на одобрување на владиниот план за заземање на градот Газа.
Во кратката видео порака снимена во делот од Газа контролиран од Јужната команда на израелската армија, Нетанјаху не кажа кој ја дал наредбата и избегна да коментира дали Израел ќе прифати предлог за ослободување на заложниците во фази, што Хамас го прифати во понеделник, објави „Тајмс оф Израел“.
„Денес дојдов во Газа за да ги одобрам плановите што ми беа презентирани мене и на министерот за одбрана од страна на вооружените сили на израелските одбранбени сили со цел да се преземе контролата врз градот Газа и да се победи Хамас“, рече тој.
Премиерот додаде дека дал инструкции за итно започнување на преговорите за ослободување на сите заложници и завршување на војната под услови прифатливи за Израел.
Според „Тајмс оф Израел“, Нетанјаху се осврнал на одлуката одобрена од кабинетот претходно овој месец, дека Израел ќе се согласи да ја заврши војната ако Хамас ги ослободи сите заложници одеднаш и се согласи со условите на Израел за предавање.
„Тие две работи, поразот на Хамас и ослободувањето на сите заложници, одат заедно“, рече Нетанјаху, додавајќи дека многу ја цени мобилизацијата на резервистите, како и на редовната армија за оваа витална мисија.
Семејствата на заложниците ги отфрлија овие аргументи, посочувајќи го фактот дека Хамас не ослободил ниту еден заложник откако Израел се откажа од претходниот предлог за договор за заложници во март.