Шестиот ден од протестите во албанскиот главен град Тирана беше одбележан со жестоки судири меѓу демонстрантите и полицијата, при што беа повредени 16 полициски службеници, едно малолетно лице и еден новинар. За време на немирите беа нападнати повеќе државни институции, меѓу кои Министерството за внатрешни работи, полициска станица и седиштето на владејачката Социјалистичка партија, објави „Албанијан пост“.
Според информациите, групи маскирани демонстранти фрлале камења, молотови коктели и пиротехнички средства кон полициските сили и објектите на институциите. Во нападите бил предизвикан пожар во дел од Полициската станица бр. 3, како и кај главниот влез на Министерството за внатрешни работи. Оштетено било и седиштето на Социјалистичката партија, каде што биле искршени стаклата на главниот влез.
Протестите започнале околу 12:30 часот пред Министерството за образование, каде што се собрале демонстрантите. Неполн час подоцна започнале првите инциденти со фрлање камења кон полицајците, а судирите дополнително се засилиле околу 13:50 часот. Во еден од инцидентите, новинар бил погоден со камен во пределот на карлицата, по што му била укажана медицинска помош.
По 14 часот, дел од демонстрантите се повлекле од просторот пред Министерството за образование и продолжиле со протестен марш низ улиците на Тирана. Тензиите повторно ескалирале околу еден час подоцна, кога поголема група демонстранти, претежно маскирани млади лица, успеала да го пробие полицискиот кордон пред седиштето на Социјалистичката партија на премиерот Еди Рама.
Демонстрантите ја нападнале зградата со камења и други тврди предмети, при што предизвикале материјална штета. За време на инцидентите биле забележани и маскирани лица како излегуваат од објектот, а дел од нив носеле стапови.
Полицијата интервенирала со солзавец и водени топови во обид да ги растера демонстрантите и да воспостави контрола врз ситуацијата. И покрај интервенцијата, немирите продолжиле, а во близина на партиското седиште биле регистрирани дополнителни инциденти.
Според медиумските извештаи, дел од демонстрантите користеле камења складирани во контејнер поставен на електричен велосипед, кои потоа ги фрлале кон зградата.
Околу 15:30 часот, групи демонстранти пристигнале и пред кабинетот на премиерот, каде што повторно дошло до конфронтации со полициските сили.
Во текот на попладневните и вечерните часови, насилството се проширило и на други локации во албанската престолнина. Особено сериозен бил нападот врз Полициската станица бр. 3, каде што демонстрантите фрлале молотови коктели, предизвикувајќи пожар и оштетувања на објектот.
Полицијата во повеќе наврати интервенирала за да ги спречи нападите и да ја стави ситуацијата под контрола, додека протестите продолжиле да бидат проследени со високи тензии и насилни инциденти.