Советникот за надворешна политика на Кремљ, Јуриј Ушаков зборуваше за денешниот телефонски разговор меѓу рускиот претседател Владимир Путин и американскиот претседател Доналд Трамп, тврдејќи дека Путин го информирал Трамп за украинскиот напад врз претседателската резиденција во регионот Новгород.
Според Ушаков, Трамп реагирал на оваа информација со неверица и бил „шокиран“ и „згрозен“, наведувајќи дека не може ни да замисли такви, како што рече, „луди дејствија“.
Ушаков исто така тврди дека Трамп рекол „Фала му на Бога“ што САД не испорачале ракети „Томахавк“ на Украина.
Ушаков додаде дека Путин во разговорот рекол дека Русија сега ќе го ревидира својот став за мир. Украинскиот претседател Володимир Зеленски претходно ги отфрли тврдењата за нападот врз резиденцијата на Путин, велејќи дека Русија се обидува да оправда нови напади врз Украина, да купи време и да ја префрли вината на Киев пред САД.