Чешкиот премиер Андреј Бабиш изрази задоволство што соработката на Вишеградската четворка се врати на практиката од „добрите стари времиња“.
Тој ја нарече Централна и Источна Европа најбезбедниот регион во Европската унија, што го објасни со успешното запирање на миграцијата.
„Разбирам дека Петер Маѓар е незадоволен и лут што неговата земја мора да плаќа казна од еден милион евра дневно, бидејќи Унгарија ја запре илегалната миграција“, изјави чешкиот премиер, пренесува HVG.
Во продолжение на своето излагање, тој истакна дека земјите од Вишеградската група ја отфрлаат можноста да добијат помалку средства во следниот буџетски циклус на ЕУ.
Потоа, од аспект на конкурентноста на земјите-членки, Бабиш упати критики кон „Зелениот договор“, односно кон политиката за зелена транзиција промовирана од претходната германска влада, која според него – покрај војната – била една од главните причини за порастот на цените на енергенсите.
Состанокот на Вишеградската четворка (В4), која ја сочинуваат Словачка, Унгарија, Полска и Чешка, се одржа денеска во Братислава, главниот град на Словачка.
Во текот на следните шест месеци, Ирска ќе претседава со Европската унија, поради што земјите од Вишеградската група го поканија премиерот на таа земја, Мајкл Мартин, на состанокот, според информациите на унгарскиот портал HVG.
Домаќинот на состанокот, словачкиот премиер Роберт Фицо, изјави дека со ирскиот премиер се разговарало за прашањата поврзани со новиот буџетски циклус на Европската унија, како и за програмата на ирското претседателство.