Националното биро за борба против корупцијата на Украина (НАБУ) денеска објави дека поранешниот министер за енергетика Герман Галушченко, кој поднесе оставка лани по откривањето на голем корупциски скандал, е приведен на границата додека се обидувал да ја напушти земјата.
„Денеска, истражните тела на НАБУ го приведоа поранешниот министер за енергетика како дел од операцијата Мидас додека се обидувал да ја премине границата“, се вели во соопштението на НАБУ.
Операцијата Мидас, на која се осврна антикорупциското тело во своето соопштение, беше спроведена за да се истражи корупциски скандал во енергетскиот сектор на Украина во текот на изминатата година.
Галушченко минатата година беше министер за енергетика и поднесе оставка во ноември заедно со други министри откако НАБУ откри голема мрежа за перење пари во енергетскиот сектор на Украина, која ја водеше олигарх близок до украинскиот претседател Зеленски.
Учесниците во мрежата поставиле систем за примање мито проценето на вкупно околу 100 милиони долари за пренасочување на јавни средства.