Новото барање на Украина за финансиски средства сè уште не е одобрено од властите во Европската унија, објави денеска францускиот весник „Монд“.
Се наведува дека во седиштето на Европската комисија се одржал состанок на кој учествувале претставници на земјите од Г7, Норвешка, Јужна Кореја и Меѓународниот монетарен фонд (ММФ).
Весникот пишува дека целта на состанокот била да се проценат потребите на Украина, која веќе бара дополнителна финансиска помош, и покрај средствата што претходно ѝ биле доделени.
„Се чувствуваме како да наводнуваме пустина“, изјавил еден европски дипломат за време на состанокот, како што пренесува парискиот дневен весник.
Во текстот се забележува дека ова најново барање за дополнителна помош наидува на незадоволство во Брисел.
Според весникот, земјите-членки на ЕУ преговараат за повеќегодишен буџет што вклучува 100 милијарди евра за Украина во периодот од 2028 до 2034 година.
Сепак, Германија и нејзините сојузници сакаат да го намалат тој буџет, па затоа обезбедувањето нова финансиска поддршка за Украина би можело да биде тешко.
Покрај тоа, како што истакнува весникот, во 2027 година во Европа ќе се одржат голем број важни национални избори, а во многу од тие земји прашањето за финансирање на Украина е особено чувствително.