Британскиот премиер Борис Џонсон е на удар на критики за неговото постапување со случајот против Крис Пинчер, пратеник обвинет за сексуално недолично однесување.
Заменик-шефот на парламентарната група поднесе оставка на 30 јуни по наводите дека пипкал двајца машки колеги во еден лондонски клуб во пијана состојба. Во текот на викендот, се појавија други обвинувања за сексуално вознемирување против Пинчер.
Политичката криза се разви во вторникот вечерта, неколку минути откако премиерот во интервју за Би-Би-Си призна дека направил „лоша грешка“ со назначувањето на Пинчер во февруари оваа година и покрај тоа што бил свесен за обвинувањата за недолично однесување против него.
Претходно, против 52-годишниот пратеник имаше поднесено две жалби поради неговото однесување во клубот Карлтон во лондонски Пикадили на 29 јуни. Двајца мажи го обвинија дека пијан ги пипкал. Откако ова прашање беше пријавено и испитано од шефот на владата на ОК, Крис Хитон-Харис, Пинчер поднесе оставка.
Извинувајќи се за своите постапки, парламентарецот рече дека „премногу испил“ и „се засрамил себеси и другите луѓе“.
Но, тоа не е се. Во текот на викендот се појавија низа понатамошни обвинувања за сексуално вознемирување заедно со сугестии дека политичарот стекнал одреден степен на озлогласеност меѓу неговите колеги, пренесува „Индипендент“.
Во 2017 година поранешниот професионален веслач и активист на ториевците Алекс Стори го обвини дека Пинлер му се нафрлал. Тогаш Пинчер ги негираше наводите и истрагата спроведена од партијата подоцна го ослободи од неправилности.