Зечевиќ негира дека бил позитивен за време на посетата на Охрид

by Фокус

Не бев позитивен за време на посетата во Охрид, ниту имав симптоми, реагира генералниот секретар на СДСМ Миле Зечевиќ, откако ВМРО-ДПМНE го обвини дека ширел ковид-зараза во Охрид на Водици.

-За време на посетата во Охрид, не бев позитивен и немав никакви симптоми – вели Зечевиќ за Фокус, додавајќи дека дури после посетата на Охрид се тестирал, а резултатот на тестот бил позитивен.

Претходно, од ВМРО-ДПМНЕ обвинија дека тој официјално е позитивен на корона вирусот од 20-ти јануари, што, според нив, значи дека претходниот ден ширел корона меѓу охриѓани.

„Ја повикуваме директорката на центарот за јавно здравје да го осуди неодговорното постапување на Миле Зечевиќ. Да се оттргне од партиските канџи на СДСМ и нека постапи совесно“, истакнаа од опозициската партија.

Во однос на тоа, реагираа и од СДСМ, од каде истакнаа дека ВМРО-ДПМНЕ шири невистини секогаш кога „се фатени како не ги почитуваат законите и здравствените протоколи“.

„Ограмна е разликата помеѓу Миле Зечевиќ и неодговорноста на Кирил Пецаков. Кирил Пецаков додека чекал резултати за Ковид 19, спротивно на протоколите, беше помеѓу граѓаните на одбележувањето на празникот Водици, наместо да биде во изолација“, истакнаа од СДСМ.

Инаку, охридскиот градоначалник Пецаков се движел меѓу граѓаните на Охрид додека го чекал резултатот од тестирање кој потоа испаднал позитивен, но тој се бранеше дека немал симптоми и дека на повтореното тестирање бил негативен.

В.С.

Поврзани новости