Здружението кое спроведе иницијатива за референдум против депонија во Неготино, ќе добие општинско признание

by Fokus 14:24
14:24

Здружението на граѓани ,,Ековита” од Неготино ќе добие општинско признание Осми Ноември, кое традиционално се доделува во чест на ослободувањето на градот. Наградата и признанијата 8-ми Ноември се доделуваат секоја година за постигнувања во одредени области од општественото живеење. Здружението ,,Ековита” беше иницијатор за одржување на референдум против изградба на депонија за индустриски и инертен отпад, кое локалната власт го најави кон крајот на минатата година.

Дури 3.323 граѓани излегоа и го дадоа својот глас, но сепак референдумот не се одржа, бидејќи дел од советниците и градоначалникот Тони Делков сметале дека референдумот е беспредметен и само ќе и донесе непотребни трошоци на општината, бидејќи според нив, проектот за депонијата бил стопиран. Во образложението за причината поради која ,,Ековита” го добива општинското признание е наведено дека активистите го следат аерозагадувањето и алармираат до населението, а ја спроведоа и иницијативата за референдум против изградба на депонија. Исто така, членовите на здружението реализирале низа на активности кои дале активен придонес за развој на граѓанскиот сектор во општината.

- Advertisements -

Учествувале на повеќе саеми, организирале промотивен настан ,,Донирај за безбеден дом и безбедна околина”, учествувале на Национален рурален парламент во Крушево, а го организирале и натпреварот за потребите на СОУ ,,Свети Кирил и Методиј” Неготино, каде ученици подготвувале рецепти на соларна енергија. Учествувале на повеќе саеми и настани надвор од земјава, и континуирано го мерат електромагнетното зрачење во градот.

Покрај Ековита, признанија ќе добијат и хуманитарецот Димитар Аврамов, наставничката Ѓорѓина Димова, младиот спортист Илија Апостоловски, а највисоката општинска награда од областа на медицината ја добива д-р Силвана Филипова, која е директор на Заводот за рехабилитација на слух, говор и глас во Скопје.

Вики Клинчарова

Поврзани новости