Засилено обезбедување во болницата „8 Септември”, по инцидентот во Ургентниот центар

Градската болница „8 Септември” го засили обезбедувањето, по инцидентот во кој толпа од триесетина револтирани роднини на починат пациент, дивеја и го демолираа Ургентниот центар.

Менаџментот на установата направил прераспределба и од фирмата која ја обезбедува болницата ангажирале дополнителен кадар. Од болницата информираат дека по инцидентот, досега немало нови закани и провокации од пациенти и посетители.

Причина за нередите во Ургентниот центар пак, била смртта на роднина, кој лекарите не успеале да го вратат во живот и по 40 минути поминати во собата за реанимација.

Минатата недела во полициската станица во Карпош биле повикани двајца од оние кои кршеле, а поради нарушување на јавниот ред и мир треба да платат казна од по 400 евра.