Претходната власт барала рекет по 200, 300 илјади евра од газдата на Југохром, истакна на вчерашниот митинг во Јегуновце лидерот на СДСМ и премиер на Македонија, Зоран Заев
Тој истакна дека ќе се изградат филтри во Југохром и дека наредната пролет фабриката ќе работи со целосен капацитет и сите работници ќе се вратат на работа.
– Сакам вечерва овде да испорачам ветувања, како моја поддршка и поддршка на Владата и мнозинството во Парламентот, за идните проекти во општина Јегуновце. Ќе работиме со новата локална власт во Јегуновце, да го обновиме секој дел на регионални патишта, и тоа од Јегуновце до Желино, 17 километри, од Лешок до Шемшово, 5 километри, и од Пршовце до Јегуновце, 5 километри. Ќе изградиме и локални патишта на релација Туденце – Сиричино и од мотел „Вратница“ до Беловчиште. Тоа е мојот збор, а зборот е збор. Денеска патриоти се тие што ќе обезбедат достоинствен живот на своите граѓани дома, тука во Македонија – рече Заев.
Според него, на 10.10. 2017 година, Југохром ќе потпише договор со владата за изградба на филтри, а во март/април ќе започне со работа.
– Дарко Блажевски, кандидатот за градоначалник душата ми ја извади за да го решиме овој горлив проблем – додаде Заев.