Заев – Орјан: Политичката стабилизација отвора можност за израелски инвестиции во Македонија

by fokus

Претседателот на  Владата на Република Македонија, Зоран Заев, утрото се сретна со амбасадорот на Израел во Република Македонија, Дан Орјан.

На средбата е изразена поддршка на промените во Македонија, во коишто се гледа можност за стабилност во државата и економски перспективи.

Амбасадорот на Израел Орјан најави интерес на израелски компании за инвестирање во Македонија, кои чекале на политичка стабилизација на Република Македонија. Земјоделството и енергетиката се некои од областите за кои има потенцијални  инвеститори.

„Ќе ја продолжиме и ќе ја засилиме добрата соработка со Израел, на сите полиња, што може да придонесе до квалитетен живот на граѓаните на Македонија. Новата Влада е силно ориентирана кон економски развој на државата, а инвестициите се важни за отворањето нови работни места. За таа цел, Владата посветено работи на обезбедувањето услови за работа на компаниите со што се отвораат можности и за достоинствена егзистенција за работниците и граѓаните на Македонија“, рече премиерот Заев.

Израелскиот амбасадор на средбата му врачи честитка на премиерот Заев, од име на израелскиот премиер Бенјамин Нетанјаху, за неговиот избор за претседател на Владата на Република Македонија, а воедно и му се заблагодари за грижата на државата за еврејската заедница во Република  Македонија. Договорено е продлабочување  на односите помеѓу двете земји и преку средби и посети на високо владино и државно ниво.

Поврзани новости