Заев: Ќе се грижиме за секој работник, доаѓаат добри времиња за Македонија

by fokus

Премиерот Зоран Заев се обрати на свеченоста по повод отворањето на новата фабрика „Адиент“ во Tехнолошко индустриската развојна зона – Струмица.

„Ќе се грижиме за секој работник. Ќе се грижиме за секоја фирма, претпријатие, компанија. Нема да има привилегии“, изјави премиерот Заев.

Отворањето на американската фабрика Адиент, почна да се гради пред доаѓањето на новата Влада, во технолошко индустриската развојна зона во Струмица. Проектот го почна претходната Влада, а сегашниот премиер Заев, како градоначалник тогаш, даде поддршка на овој проект и го поздрави.

„Уверен сум, од одлучноста и ентузијазмот со којшто работи новата Влада, дека доаѓаат и добри времиња за сите граѓани на Македонија.

Оваа странска, американска инвестиција отвора работни места и поради тоа е од огромно значење на граѓаните на нашата земја. Инвестициите и се потребни на Македонија и поради тоа ќе посветиме големо внимание на развивањето поволна деловна клима во државата.

Преку реформскиот процес зад којшто застанавме цврсто како Влада, ќе ги отвориме евро-атлантските интеграции на Македонија. Насочени сме да овозможиме доследна примена на законските и правните регулативи, со еднакви шанси за сите и со политики на нула корупција“, рече премиерот.

Според него, исполнувањето на условите за ЕУ и НАТО, ќе ја постави Македонија меѓу државите стабилни за инвестирање, а тоа ќе биде охрабрување за странските инвеститори, вистински, квалитетни, модерни, развиени компании како оваа, да вложуваат во Македонија.

„Нашата цел е, почитувани граѓани, и инвеститори – актуелни и потенцијални, како држава да обезбедиме вистински развој на бизнис секторот, затоа што само тоа е патот кон посакуваниот и потребниот економски развој на Република Македонија.

Ако фирмите и компаниите добро работат, тогаш ќе има и повисоки плати за работниците и нови работни места за граѓаните. Ќе има и економска стабилност и напредок во државата.

Во правна и праведна држава, новата Влада на Република Македонија ќе го реализира ветеното општество на отворени можности: на граѓаните за своите егзистенции, на фирмите за нивниот развој, на перспективите за Република Македонија што ќе значат перспективи за секој кој живее и работи во нашата држава“, рече Заев во обраќањето.

 

Поврзани новости