Денеска се навршуваат девет години од смртта на некогашниот претседател на Република Македонија, Киро Глигоров.
Премиерот Зоран Заев вели дека Глигоров оставил силен личен печат и еден од оние кои биле во првите борбени редови за демократска преобразба на земјава.
„Со државнички способности, мудрост и дипломатски такт, учествуваше активно во најважните процеси на надворешната политика и успешно ги релаксираше меѓуетничките односи.
Претседателот Глигоров е меѓу најзаслужните што Република Македонија беше единствена држава од поранешна СФРЈ која ја испрати ЈНА со потпишан договор, без ниеден испукан куршум и жртва.
Во исклучително тешка ситуација успеа Македонија да не биде оставена на ветрометината на тогашните закани и да стане членка на ООН, со што го отвори институционалниот пат нашата држава да ги остварува стратешките цели – членството во НАТО и отворениот процес за членство во ЕУ“, напиша премиерот Заев.