За набавка на вакцините за Ковид -19 обезбедени се околу 8,4 милиони евра, а доколку има потреба за дополнителни дози, ќе бидат обезбедени дополнителни средства, соопшти вицепремиерот за економски прашања, Фатмир Битиќи.
– За првпат во државата ќе имaме ситуација во која поголем број на лица ќе треба да се вакцинираат. Над 400 илјади луѓе ќе се вакцинираат. Имаме донесено одлука за достапност на средства за набавка на вакцини околу 8,4 милиони евра. Остануваме на ставот дека ќе најдеме средства, доколку се потребни за дополнителен број вакцини во наредниот период, рече Битиќи.
Министерот за здравство Венко Филипче, денеска пак на седница на Влада поднел Предлог-програма за изменување и дополнување на Програмата за задолжителна имунизација на населението во Република Северна Македонија за 2020 година.
Програмата предвидува измени во делот за финансиски, средства како една од обрвските преземени со договорот со ГАВИ за влез во Ковакс механизмот. Средствата се веќе обезбедени со последниот ребаланс на буџетот. Преку Ковакс механизмот ќе се обезбедата 833.000 вакцини, овие дози вакцини се за популација од околу 400.000 граѓани за вакцина и ревакцинација.
Вакцините во земјава ќе стигнуваат согласно планот за дистрибуција кој ќе го одреди Ковакс, а испораката ќе биде истовремено во сите 127 земји, како и земјите од регионот Црна Гора, Албанија, Косово, Босна и Херцеговина и дел од Србија. Првата испорака на вакцини се очекуваат во првите месеци од 2021 година.
„Покрај овој механизам, Министерството за здравство започна преговори, односно достави формални барања за обезбедување вакцини уште преку два други механизми. Првиот е во директни преговори и со директна набавка од компаниите Фајзер и Астра Зенека кои ги произведуваат вакцините, а од каде наскоро очекуваме да имаме и формална понуда. Третиот механизам е преку Европската Унија за што е исто така формално побарано од делегацијата во Скопје и очекуваме информација. Што се однесува до набавката во рамки на Европската Унија, таа нарачува 200 милиони вакцини за земјите членки и уште дополнителни 100 милиони дози за земјите од Европа надвор од Унијата, истакнува Филипче.
Ковид вакцината ќе биде бесплатна за сите граѓани и нема да е задолжителна. -Со почетокот на вакцинацијата нема веднаш да се намали ризикот од Ковид 19, ниту пак веднаш ќе се почувствува намалување на притисокот врз здравствените установи, но вакцинацијата и натаму доследното почитување на превентивни мерки можат значително да ја смената сликата на пандемијата. Вирусот Ковид 19 ќе продолжи да циркулира и следниот период оттука мерките за превентива и заштита како носење маска, држење дистанца, негрупирање, хигиена на раце ќе бидат задолжителни и во периодот пред нас, вели Филипче.
На приоритетната листа за вакцинација први ќе бидат здравствените работници кои работат со ковид, како и ризичните групи граѓани со зголемен ризик за Ковид 19, за кои вакцината ќе биде високо препорачана, но не и задолжителна.