Во услови на епидемија да се отстранат сите кои можат да ја загрозат, реагираат разрешени членови на Комисијата за УНЕСКО

by Frosina Fakova

На седница на Владата одржана на 26 мај била донесена одлука да се разрешат тројца членови на Комисијата за управување со светското природно и културно наследство во Охридскиот регион. Решението на Владата е објавено во Службен весник, па од членови на Комисијата се разрешени Донка Барџиева – Трајковска, Елеонора Новаковска и Сашо Коруновски, а на нивно место се именувани Јулија Тричковска, Горан Патчев и Ана Петровска.

-Одличен потег на владата!Во услови на епидемија мора да се отстранат сите кои на било каков начин можат да ја загрозат!, напиша Барџиева – Трајковска на својот Фејсбук профил споделувајќи го решението на Владата.

Комисијата за управување со светското природно и културно наследство на Охридскиот Регион е именувана во јануари 2018 година. Членовите на Комисијата ги именува Владата на предлог на надлежните министерства и другите институции кои по било кој основ имаат права и интереси во управувањето со светското природно и културно наследство на охридскиот регион.

Од Владата „Фокус“ објаснуваат дека Новаковска и Коруновски повеќе не биле членови на институциите и телата од кои биле номинирани во Комисијата, додека за Барџиева-Трајковска била член на Координативното тело за реформите во културата и во заштитата на културното наследство.

-За членовите од претходниот состав на Комисијата можеме да Ве информираме дека Елеонора Новаковска беше номинирана како директор на НУ Музеј и Завод-Охрид, и дека таа повеќе не е директор ниту вработена во оваа установа. Сашо Коруновски беше номиниран како член на Националната комисија на УНЕСКО, каде што повеќе не е член.

Донка Барџиева-Трајковска во изминативе години учествуваше во повеќе работни групи за заштита на културното наследство при Министерството за култура. Барџиева-Трајковска е член на Координативното тело за следење на процесот за реализација и имплементација на реформите во културата и во заштитата на културното наследство. Ова советодавно тело има активно учество и дава придонес во креирањето на културните политики и во решавањето на најсложените проблеми кои се јавуваат во културата и во заштитата на културното наследство.

Барџиева-Трајковска со своето знаење и искуство преку активностите во овие работни групи и особено со ангажманот во Координативното тело дава огромен придонес за унапредување на состојбата во заштитата на културното наследство во земјава. Придонесот и влогот на тројцата експерти од претходниот состав на Комисијата е од големо значење за културата и заштита, особено нивните искуства кои беа имплементирани во управувањето со Охридскиот регион.

Министерството за култура и Владата на Република Северна Македонија се насочени кон остварување континуитет и нови резултати од постоечките работни групи. Во исто време, Ве информираме дека и новите членови на Комисијата кои се докажани експерти во областа на заштитата на природното културното наследство, на новиот ангажман пристапуваат со особено внимание и фокус, особено сега кога повредите во Охридскиот Регион повторно стануваат реалност, и се зголемува обемот на работа, велат од Владата.

Разрешувањето на членовите доаѓа во услови кога изминаа роковите за исполнување на препораките од УНЕСКО за заштита на Охрид, а локалната и централната власт не може да се справат до дивоградбите кои никнуваат во овој регион.

Ф.Ф.С.

Поврзани новости