Oдредени политички партии нуделе поткуп на избирачите за да не излезат на прегласувањето кое ќе се одржи во недела, изјавија од граѓанската организација „Цивил“ на денешната прес-конференција во Теарце.
– За ова тврдење имаме и сведоштва, прибавуваме и докази за ваквите дејствија од одредени политички партии. Дознаваме дека апстинирањето од гласањето во недела чини од 3.000 до 6.000 денари за глас – изјави првиот човек на „Цивил“, Џабир Дерала.
Тој нагласи дека никој нема право на граѓаните да им го одземе правото на глас и секој обид да се спроведе некоја незаконска активност од типот на поткуп на гласачи е казниво со закон.
– Ние од теренот имаме сознанија дека во тек се активности за поткуп на гласачи. Постои обид да се намали излезноста на гласачите на прегласувањето во Теарце – посочи Дерила.
Цената на гласот е поголема овојпат од претходните дојави од граѓанските организации кои алармираа дека гласачите за 11-ти декември се поткупуваа и со илјада денари.
Гласањето овојпат е важно затоа што во Теарце, на денот на изборите ВМРО-ДПМНЕ освоила победа со само четири гласа пред СДСМ. На ниво на шеста изборна единица пак, разликата меѓу двете партии е 307 гласа. Прегласувањето во ова тетовско тело може да со смени изборниот реултат, па од 51 пратеник за ВМРО-ДПМНЕ и 49 за СДСМ, да биде нерешено, односно 50:50.