Поради обилните врнежи кои наврнаа во изминатите неколку дена, делови од Хрватска се поплавени, а метеоролозите и хрватските води најавуваат уште потешка ситуација за денеска, бидејќи следуваат нови врнежи, па треба да се очекува нов подем на сите реки. .
„Во моментов најкритично е во Хрватска Костајница, Уна има многу високи водостои, 10-15 сантиметри под нивото за прогласување вонредна состојба“, вели Томислав Новосел од Главниот центар за заштита од поплави на хрватските води.
Задарската жупанија на социјалните мрежи објави видео на кое се гледа надојдената Зрмања во Обровац и истакнуваат дека нивото на водата е намалено за околу половина метар во однос на синоќа и сега изнесува 254 сантиметри. Инаку, со 302 сантиметри вчера во овој град е забележано историско ниво.
„Сепак, со оглед на очекуваните нови врнежи, состојбата се уште е сериозна, па се преземаат мерки за превенција и заштита“, соопштија од Задарската жупанија.
Поради поплавата вчера наставата е откажана во гимназијата во Обровац, а хрватскиот премиер Андреј Пленковиќ најави помош од Владата за санирање на последиците од поплавите.
Поплавениот Обровац утрово го посети потпретседателот на хрватската Влада и министер за внатрешни работи, Давор Божиновиќ, кој го посети просторот каде што беа поставени дополнителни брани.
За денеска метеоролозите најавуваат нови врнежи и грмежи, а пообилни врнежи се очекуваат во централниот дел и планинските предели.