Во Државен карантин во Хотел „Монтенегро“ кај Велес во моментот престојуваат 79 лица повратници од странство, а најголем дел од нив се млади кои работеле на крузери, сите се здравствено прегледани и се во добра состојба, информира за МИА Страхил Тодоров, портпарол на ЈЗУ Здравствен дом од Велес.
Лекарски екипи на Здравствениот дом заедно со нивни колеги од ЈЗУ Општа болница Велес постојано дежураат во Хотел „Монтенегро“ и ја следат нивната здравствена состојба. Меѓу овие лица има жители на Велес,Скопје,Струмица и селата од струмичко, Кавадарци, Куманово, Крива Паланка, Гевгелија, Неготино, Охрид, Прилеп и Штип.
– Сите се прегледани и се во добра општа здравствена состојба, информира д-р Тодоров.
Тој појасни дека овие лица тука во државен карантин биле сместени на 22 и 23 мај, а ќе останат во наредните 14 денови и ако се во добра здравствена состојба ќе бидат пуштени дома.
Инаку, во изминатата недела од Државен карантин од Хотелот „Монтенегро“ кај Велес дома си заминала втората група повратници од странство од вкупно 80 лица. Првите 20 си заминале на 21 мај, на 22 мај заминале дома 47, а на 23 мај и преостанатите 13 лица, информира Тодоров.