Вишото обвинителство ја „оживеа“ кривичната против Ангеловска за повлекувањето на заштедата од 250.000 евра од Еуростандард банка

by fokus

Вишото јавно обвинителство ја врати во живот кривичната пријава која Левица пред неколку месеци ја поднесе против екс министерката за финансии Нина Ангеловска, со обвинение дека ги повлекла своите пари од Еуростандард банка пред таа да пропадне. Поточно, основното обвинителство прво ја отфрли кривичната пријава, но сега Вишото обвинителство ја прифати поднесената жалба од партијата.

-Вишото јавно обвинителство Скопје, согласно своите законски надлежности, по увидот во жалбата и списите од предметот донесе Решение со кое жалбата ја уважи и го задолжи Основното јавно обвинителство Скопје да ја продолжи постапката со цел утврдување на сите неопходни факти и донесување соодветна јавнообвинителска одлука која ќе произлезе од утврдените факти и докази, одговорија за „Фокус“ од Обвинителството.

Според кривичната пријава која ја поднесе Левица, додека Ангеловска била на функција, наводно, злоупотребувајќи инсајдерски сензитивни информации го повлекла својот депозит во вкупен износ од 250.000 евра од Еуростандард банка непосредно пред банката да пропадне, со што ја искористила службената положба за остварување лична корист и се поставила во привилегирана и фаворизирачка позиција во однос на останатите доверители.

-Со ваквото умислено и противправно однесување пријавената го прекршила член 50 од Законот за спречување на корупција и судир на интереси со што се исполнети условите за кривичен прогон по службена должност за сторено тешко кривично дело Несовесно работење во службата, обвинуваа од Левица.

Оттаму потенцираа и дека за ова кривично дело е предвидена тригодишна затворска казна како јавен деликт насочен против службената положба.

Народна банка ѝ ја одзеде дозволата за работа на Еуростандард банка на 12 август 2020 година, по што беше отворен стечај за банката. На 16 август, министерката Ангеловска кажа дека во два наврати извадила пари од Еуростандард банка, првиот пат да инвестира во инвестициски фонд, а вториот пат да си купи стан, бидејќи, како што кажа таа, живеела под кирија.

Валентина Вурмо

Поврзани новости