Најголемите политички партии и нивните коалиции етапно презентираа кандидати за градоначалници на претстојните локални избори, меѓу кои беа и кандидатите за поголем број од скопските општини. Меѓутоа, во дел од нив не се познати луѓето со кои ќе настапат СДСМ и ВМРО-ДПМНЕ, бидејќи се уште траат внтрепартиските испитувања и анализи.
Една од нив е Општина Карпош, каде, според информации на Фокус, актуелниот градоначалник Стефан Богоев нема да влезе во трка за уште еден мандат. Имено, СДСМ наскоро треба да ја официјализира кандидатурата на Душко Весковски, актуелен директор на скопското јавно претпријатие „Водовод и Канализација“.
Неофицијално, негов противкандидат од ВМРО-ДПМНЕ ќе биде докторот-педијатар Оливер Зафировски. Воедно, во конкуренција е и поранешниот градоначалник и лидер на опозициската ГРОМ Стевче Јакимовски, кој има амбиции за уште еден мандат, но неговите шанси се помали.
Ниту една од двете партии досега не ги објавиле кандидатите за градоначалници и на Аеродром. Високи партиски извори велат дека во СДСМ, покрај актуелниот градоначалник Златко Марин, во игра е и поранешниот пратеник Александар Филиповски, познат како организатор на Галичката свадба.
Што се однесува до ВМРО-ДПМНЕ, изборот треба да падне, исто така, меѓу двајца најсериозни потенцијални кандидати. Еден од нив е претседателот на партискиот комитет во Аеродром, Дејан Митревски, а вториот е пратеникот Синиша Стојаноски, кој се смета дека има блага предност.
Досега, ВМРО-ДПМНЕ објави дека ќе ја поддржи универзитетската професорка Наташа Котлар од Глас за Македонија за градоналник на Центар. Во рамки на СДСМ, за оваа номинација битка водат неколку лица, со тоа што последните информации говорат дека фаворит е претседателот на општинскиот комитет Горан Герасимовски, кој е директор на Државниот завод за индустриска сопственост.
Во Ѓорче Петров, пак, СДСМ ќе настапи со актуелниот градоначалник Александар Наумовски или пратеникот Костадин Ацевски, со тоа што сознанијата говорат дека анкетите поголема предност му давале на Наумовски. Еден од нив, всушност, треба да му се спротивстави на веќе јавно објавениот кандидат од редовите на ВМРО-ДПМНЕ – Александар Стојкоски.
Инаку, веќе е познато дека во Бутел ќе се судрат Велимир Смилевски и Дарко Костовски, во Гази Баба Борис Георгиевски и Бобан Стевковски, а во Кисела Вода Филип Темелковски и Орце Георгиевски. На ниво на Град Скопје, пак, СДСМ ќе настапи со Петре Шилегов, додека, како што веќе објавивме, ВМРО треба да застане зад кандидатурата на Даниела Арсовска, претседателка на Сојузот на стопански комори.
Влатко Стојановски