Велешкиот градоначалник спаси жена, вели дека секој на негово место би го направил истото

by Фокус

Немав време за размислување, инстинктот веднаш направи да реагирам. Излегов од колата, ја фатив жената која сакаше да скокне од оградата на мостот. Дојдоа минувачи, повикавме полиција – за ,,Фокус” раскажува велешкиот градоначалник Марко Колев, за вчерашниот случај, кога враќајќи се од работа спасил жена која сакала да се фрли во реката Вардар.

Ја забележал случајно и во тие моменти само сакал да ја спаси. Додава дека го направил она кое секој друг на негово место би го сторил. Се нашол на вистинското место во вистинско време, реагирал, и се надева дека жената ќе биде добро.

За неа пак, велешани раскажуваат дека имала тешка судбина. Била на возраст од околу 60 години, а одамна го изгубила синот. Тој бил удрен од возило и починал на самото место, но мајката не ја надминала трагедијата.

-Се сеќавам на случајот, пред повеќе години беше. По некоја случајност, дури и знам каде и е закопан синот, би требало да е мој врсник, не ме држете за збор. Полицијата ги има сите детали за она кое се случи вчера. Дел од секунда беше, да немаме вакви настани повеќе – вели Колев.

Откако стапи на функцијата градоначалник, често добива пофалби од своите сограѓани, најмногу поради човечноста и тоа што е достапен за сите жители кои имаат некаква мака. За ,,Фокус” вели дека се труди зад себе да остави позитивен белег и да биде запаметен по добро кај велешани.

Вики Клинчарова

Поврзани новости