Уставниот суд денеска го објави дневниот ред за седницата закажана за во среда, но во него повторно не е ставена иницијативата за Законот за Специјалното јавно обвинителствио (СЈО).
Дневниот ред до неодамна го правеше судијката Елена Гошева, но откако на претседателското столче седна Никола Ивановски, сега тој е надлежен за неговата содржина. Но, и тој како и својата претходничка, од за нив познати причини, не ја земаат во работа оваа иницијатива, иако е поднесена уште пред една година, а пред 4 месеци беше дадена на судија известител.
Уставниот суд при оценување на уставноста на законот има можност да донесе два вида одлуки: една за укинување на целиот закон или за укинување на одреден член или членови од законот, и одлука за поништување на целиот закон или за поништување одреден член или членови од законот.
ВМРО-ДПМНЕ, СДСМ, ДУИ и ДПА, на последната лидерска средба се договорија доколку Уставниот суд го укине СЈО, тие да го вратат во рок од пет дена, но тоа сега е оневозможено бидејќи Собранието е веќе распуштено. Токму затоа се инсистираше иницијативата да се разгледа пред распуштањето на Собранието, но Уставниот суд со месеци не ја ставаше иницијативата на дневен ред.
В.В.