Поради долг, почна постапката за одземање на дозволата на ТВ Алфа, од каде што имаат 15 дена рок да соберат пари и да го уплатат долгот кон ОНЕВИП, од каде се емитува сигналот на телевизијата, по што ќе може да продолжи со работата. Ваквата одлука е донесена на денешната седница на Агенцијата за аудио и аудиовизуелни медиумски услуги (АВМУ).
– По редовниот мониторинг утврдивме дека не се емитува сигналот на телевизијата. Побаравме од ОНЕВИП да одговорат за што се работи, дали е технички проблемот, зошто не го доставуваат сигналот. На 16 август ни одговорија дека поради неплатени обврски го исклучиле емитувањето и по основа на тоа дека сега е повеќе од 30 дена од неемитување на програма, се дава предлог за отпочнување на постапката за одземање на дозволата – истакна директорот Зоран Трајчевски.