Незадоволството поради протестното палење на Куранот во Шведска доведе до втор ден протести во Турција денеска, како одраз на политичките тензии меѓу двете земји.
Околу 250 луѓе се собраа пред шведскиот конзулат во Истанбул и ја запалија фотографијата на данскиот антиисламски активист Расмус Палудан, кој во саботата ја запали светата книга на исламот пред турската амбасада во Стокхолм, што предизвика протести во Истанбул и Анкара истата вечер.
Учесниците на денешната средба носеа зелени исламски знамиња и транспарент: „Ја осудуваме исламофобијата поддржана од државата Шведска“, додека на прозорецот на шведскиот конзулат пишуваше: „Не го делиме ставот на тој идиот што пали книги“.
Протестите ја обновија загриженоста дека Турција ќе ги спречи Шведска и Финска да влезат во НАТО. Турција сè уште не го одобри членството на нордиските земји во воената алијанса, велејќи дека Шведска треба да ги реши безбедносните грижи на Анкара.
Турските функционери ја критикуваа Шведска што дозволи протест на којшто беше запален Куранот.
Претседателот Реџеп Таип Ердоган не искоментира ништо за време на неговите говори викендот, додека шведскиот премиер Улф Кристерсон во саботата твитна дека слободата на изразување е клучна за демократијата, но дека „она што е легално не е нужно соодветно“.
„Палењето книги кои се свети за многумина е чин на длабоко непочитување. Сакам да изразам сочувство до сите муслимани кои се навредени од она што се случи денеска во Стокхолм“, рече Кристерсон.
Демонстрантите денеска по втор пат се собраа пред шведската амбасада во Анкара. Повеќе протести се најавени на други места во Турција.