ТХП: Доаѓа нова влада, ВМРО – ДПМНЕ имаше двојни стандарди кон Турците

by fokus

Како што доаѓа крајот на режимот предводен од ВМРО-ДПМНЕ, така доаѓа крајот и на голготата на граѓаните од помалку бројните етнички заедници. Доаѓа влада која ќе се грижи подеднакво за сите граѓани на Република Македонија, порачува Партијата за движење на Турците (ТХП) во денешното соопштение.

Во своето 10 годишно владеење ВМРО-ДПМНЕ се постави деструктивно кон сите помалку бројни етнички заедници. Во изминатава деценија освен што немаше никаков напор, ниту пак цел да се подобрат правата и животниот квалитет на помалку бројните етнички заедници, туку за жал истите беа уназадени и сосема разнебитени, се вели во соопштението на Партијата за движење на Турците во Македонија – ТХП.

„Истата тажна слика се повторува и за турската етничка заедница. За жал, владата предводена од ВМРО-ДПМНЕ имаше двојни стандарди кога станува збор за граѓаните од турската етничка заедница во Македонија. Во сите сегменти од општеството Турците беа игнорирани, изолирани и заборавени.

Бројот на Турците кои се вработени во државната администрација и натаму е далеку од задоволително, односно не е постигната ниту половина од оптималната бројка. Владата под палка на ВМРО-ДПМНЕ го остави НУ Турски Театар без своја зграда и без основни творечки услови. Од медиуми до култура, од образование до здравство во сите сфери Турците се запоставени.

Сметаме дека под ваквите околности и факти не само што е некоректно туку и невкусно е ВМРО-ДПМНЕ да говори како се залага за правата на помалку бројните етнички заедници. Немаме никакви проблеми со меморијата, ниту пак со интелигенцијата. Фактичката состојба говори доволно за пристапот на ВМРО-ДПМНЕ кон граѓаните од турската етничка заедница“, вели ТХП.

 

Поврзани новости