Тажна сум и тоа нема никогаш да помине – сеќавањата на Лилјана Петровиќ

by Fokus 12:40
12:40

Не бев свесна што се случува, почувствував удар, паднав помеѓу седиштата, а потоа дојде уште еден удар. Имав болки во ребрата, но кога го видов Тоше, заборавив на болката и излегов надвор од џипот. Почнав да викам по Тоше, раката му беше уште топла- со овие зборови раскажуваше Лилјана Петровиќ за првите моменти по сообраќајната несреќа кај Нова Градишка, Хрватска, која се случи на денешен ден пред тринаесет години, а во која згасна животот на Проески.

 

Петровиќ, која остана запаметена како менаџерката на Тоше Проески, под чија закрила тој стана препознатлив музички бренд и голема ѕвезда на Балканот, денес има 62 години. Смртта на Тоше значеше и крај на нејзината менаџерска кариера и почеток на еден живот подалеку од сцената и очите на јавноста. Од секојдневието исполнето со телефонски разговори, потпишување на договори, темелна организација на настани и многу патувања, за Лилјана започна ново поглавје, подалеку од шоу бизнисот, во родната Србија каде се обиде да си го пронајде мирот.

- Advertisements -

За соработката со Тоше, раскажуваше дека започнала спонтано, бидејќи не ни планирала да заплови во менаџерските води. Сепак, не можеше, а да не се забележи посебната врска која ја имаа, а која не беше типична за музичар и негов менаџер, бидејќи Петровиќ, како што и самата знаеше да изјави, едноставно не ставила граница помеѓу приватното и професионалното.

Таа беше негов најголем заштитник и негова верна придружба на сите настани, односно менаџер кој нема одредено работно време и во целост го прилагоди својот живот кон потребите на музичката кариера на Тоше.

Денес, Петровиќ живее во соседна Србија, а веќе две години е повлечена и од социјалните мрежи. Во последното интервју за „Фокус” од пред три години, раскажа дека живее на релација Смедеревска Паланка – Ниш и дека има премногу работа на плантажата на која одгледува лаванда и други лековити билки. Тогаш откри дека започнала да му помага на пејачот Амар Гиле околу маркетинг и снимања, но за активно враќање во менаџерските води, со присуство на настапи и концерти, појасни дека нема амбиции за враќање во јавниот живот.

Категорична беше дека никогаш повторно не би се впуштила во менаџерството на начинот на кој работеше со Тоше, бидејќи тоа е завршено поглавје во животот, кој за неа никогаш нема да биде ист.

-Кога би го вратила времето наназад, не би сменила ништо во начинот на кој ја водев кариерата на Тоше. Мислам дека не направив ништо погрешно. И длабоко во душата знам дека доколку не се случеше несреќата, тој денес ќе имаше блескава светска кариера. Тажна сум, и тоа нема никогаш да помине – ни изјави Лилјана во последното интервју.

Вики Клинчарова

Поврзани новости