Вечерва во Експо центарот во Тел Авив нашата претставничка Тамара Тодевска ќе се бори за влез во финале на Евровизија. Таа ќе настапи 17-та по ред, односно претпоследна, со моќната балада ,,Proud”. Судејќи според досегашните реакции на јавноста, песната е добро прифатена и се очекува добар пласман.
Од Тел Авив, по пресрет на втората полуфинална вечер, Тодевска порача дека ќе го даде максимумот. -Верувам во нашата песна и нашиот тим. Верувам дека ќе го дадеме максимумот. Имам одличен тим и луѓе со кои секојдневно се гордеам и ме прават подобра личност. Вечер ќе ве направиме горди, сигурна сум во тоа – изјави пејачката.
Покрај неа, вечерва во Тел Авив за влез во финале ќе се борат и претставниците на Ерменија, Ирска, Молдавија, Швајцарија, Латвија, Романија, Данска, Шведска, Австрија, Хрватска, Малта, Литванија, Русија, Албанија, Норвешка, Холандија и Азербејџан. Големото финале ќе се случи на 18-ти мај.
Вики Клинчарова