Шефот на СЗО за вонредни ситуации Мајкл Рајан регираше на изјавата на британскиот министер за здравство
Новата мутација на коронавирусот откриена во Велика Британија, која се шири побрзо, „не е надвор од контрола“, објави Светската здравствена организација, и притоа повика да се спроведуваа досегашните мерки на заштита.
-Имавме R0 фактор (стапка на размножување на вируси) многу повисок од 1,5 во различни периоди во оваа пандемија и го надминавме. Затоа, оваа ситуација не е надвпр од контрола во таа смисла, изјави шефот на СЗО за вонредни ситуации Мајкл Рајан на прес-конференција.
Тој реагираше на вчерашната изјава на британскиот министер за здравство, Мет Хенкок, кој оцени дека „новиот вид на коронавирус е надвор од контрола“. Рајан процени дека иако вирусот „е малку поефикасен во смисла на ширење“, тој може да се запре.
-Мерките што во моментов постојат се добри. Треба да продолжиме да го правиме она што го правиме и досега. Можеби ќе треба да го правиме тоа поинтензивно и подолго време за да се осигураме дека можеме да го надминеме овој вирус, додаде тој.
СЗО вчера најави дека ќе се спроведат и нови истражувања за ефикасноста на вакцината против новата варијанта на коронавирусот, иако засега вели дека ништо не упатува дека ќе има разлика во однос на делотворноста.
Но, и покрај тоа, бројни земји во светот од вчера ги затворија своите граници со Велика Британија и (или) Јужна Африка, каде што се појави оваа друга варијанта на вирусот, за да се избегне понатамошно ширење на вирусот.