Студентски пленум за во понеделник го најави настанот „„Ние не чекаме избори…заокружи Гоце“, кој ќе се одржи во паркот зад салата „Форца“ со почеток во 20:00 часот. На настанот ќе има проекција на филмот за студентскиот дома Гоце Делчев со наслов „Зелени ѕидови, црна храна“ на режисерката Сандра Ѓорѓиевска. Потоа, ќе следи дискусија за условите во студентските домови.
-Нè држат уплашени со фрази, со мистерии, со догми. Нè држат уплашени дека ќе ни го земат лебот, ќе ни го срушат домот, ќе ни ја скршат вилицата, а ние уплашено правиме план и ги поздравуваме. Но, сè додека се плашиме тие ќе газат преку нас. Слободата ќе дојде кога ќе го надминеме стравот, пишуваат од Студентскиот пленум и додаваат:
„Слобода е кога на улиците ќе се исфрлат и истресат сите сандаци од мувлосаните тавани, сите постели со влажен памук, кога ќе се истребат сите лебарки, подрумски стаорци и маларични комарци, кога домовите ќе се реновираат, кога студентите ќе се разбудат и ќе прозборат за маките. Ќе чекаме ли жртва за да си ги побараме правата?! НЕ! Ние, студентите, не чекаме избори!“