Генералниот секретар на НАТО, Јенс Столтенберг ја потврди денеска одлуката на Алијансата да ги повлече своите сили од Авганистан заедно со САД, по изјавата на американскиот претседател Донлад Трамп за повлекување до Божик.
– Одлучивме заедно да го напуштиме Авганистан. Ќе го усогласиме повлекувањето, истакна Столтенберг на заедничката прес-конференција со премиерот на Северна Македонија, Зоран Заев.
Трамп, во екот на кампањата за претседателските избори, изјави дека сака да ги повлече американските војници од Авганистан до Божик, побрзо од предвиденото со договорот меѓу САД и талибанците.
– До Божик би требало да се вратат дома мал број храбри мажи и жени, кои се уште служат во Авганистан!, напиша Трамп синоќа на Твитер.
Администрацијата на Трамп се обврза дека ќе ги повлече сите американски сили од Авганистан најдоцна до средина на 2021 година.