Специјалното јавно обвинителство попладне испрати писмено барање до Јавното обвинителство да му бидат доставени статистички податоци за предметите произлезени од прислушувани разговори, односно колку предмети има и кои се тие.
Откако ќе ги добие тие информации, специјалната обвинителка Катица Јанева ќе испрати барања до обвинителствата да ги пратат предметите, кои ќе ги презеде во своја надлежност и истрага.
Од регуларното обвинителство, пак, информираа дека бараната статистика се однесува на бројот на оформени предмети, назначување на јавните обвинителства пред кои се оформени предметите и броеви под кои се заведени предметите.
Од таму постапуваат по ова брање и бараните податоци ќе ги достават во најкраток можен рок, кој, според Законот, најмногу може да изнесува 8 дена.