Спасов денеска не дошол на работа, Ременски бара ич да не доаѓа ВИДЕО

by fokus 16:58
16:58

Диме Спасов, допонителниот заменик министер за труд и социјална политика денеска не се појавил на работното место, потврди министерката Фросина Ременски.

„Поради сериозно нарушување на угледот на Министерството за труд и социјална политика, јавно го повикувам дополнителниот заменик министер за труд и социјална политика, Диме Спасов, да се повлече од политичката функција, од причини што постапил неодговорно за фукцијата што ја извршува, изјави Ременски.

- Advertisements -

Таа денеска на прес конференција ги наброја сите прекршоци што ги направил Спасов:

За приватни цели и интереси, противзаконски располагал и управувал возило на Агенцијата за вработување на РМ за што не постои никаков документ за користење – решение, полномошно и налог;

Ја загрозил безбедност на патниците во сообраќајот;

Ненел материјална штета на возилото што го управувал и на возилата што ги удрил и противправно трошел средства за гориво на МТСП за потребите на возило кое не е сопственост на министерството;

Ѝ избегал на полицијата со што го попречил полициското постапување за утврдување на неговата психо-физичка состојба; и надвор од секаква етика и морал

Поттикнал друго лице, вработено како возач во МТСП, а не како негов возач, спротивно на реалната состојба да ја преземе одговорност за неговото несовесно постапување.

„Очекувам МВР да го расветли инцидентот поврзан со дополнителниот заменик министер за труд и социјална политика со што ќе се покаже неселективност во постапувањето и еднаквост на сите граѓани пред законот“, рече Ременски.

Прес конференцијата на министерката ја пренесуваме во целост:

„Должна сум да ја информирам јавноста дека возилото „туарег“ што е користено од страна на Диме Спасов во саботата кога се случи инцидентот е сопственост на Агенцијата за вработување.

Ова возило не е единствено што го користел дополнителниот заменик министер. Спасов противзаконски располагал веќе подолго време уште со други три возила коишто со Одлука на Владата на РМ (бр. 42-8184/2 од 12.08.2015 година) се дадени на трајно користење без надомест на Агенцијата за вработување.

Тоа значи дека освен дополнителниот заменик министер Диме Спасов и директорот на Агенцијата за вработување, противзаконски и спротивно на Правилникот за користење на службени возила во сопственост на АВРМ, овозможил возила на Агенцијата да бидат на располагање на неовластени лица надвор од работното време и задачи.

Поради сето ова, до Владата на Р.Македонија и до надлежните органи ќе доставиме пријава за злоупотреба на службена положба и овластувања од страна на ВД директорот на АВРМ, кој спротивно на закон повеќе од двапати е именуван на функцијата вршител на должност, а во моментот извршува функција со истечен мандат. Дополнително што и Канцеларијата на Европската комисија во јули оваа година, утврдила несоодветна употреба и располагање со средствата (10 возила) кои преку ИПА фонд се набавени за потребите на АВРМ и ДИТ и побарала поврат на средства од АВРМ и ДИТ во висина од 27.000 евра. Сето ова е констарирано во неодамнешниот Ревизорски извештај за АВРМ од страна на државниот ревизор на РМ.
Ве информирам и дека во Министерството за труд и социјална политика преземаме мерки за утврдување одговорност за возач во министерството кој не е возач на дополнителниот заменик министер, а ја презел одговорност за инцидентот во саботата.

Од сите овие причини, барам, Диме Спасов, да ја преземе одговорноста за своето неодговорно и несовесно работење и да се повлече од политичката функцијата дополнителен заменик министер за труд и социјална политика.“

 

Поврзани новости