Неколку социјално загрозени прилепски семејства тврдат дека нерегуларно се одбиени од конечната листа корисници на социјални станови под закуп во населбата Точила, а на нивно место се вдомени граѓани, членови на владејачката ВМРО-ДПМНЕ, кои се во подобра социјална состојба.
Во интервју за ЦИВИЛ, тие информираа дека веќе поднеле тужби до Министерството за транспорт и врски, затоа што се сомневаат во исправноста на софтверската апликација за електронска распределба на социјални станови под закуп, изградени согласно владината Програма за социјални станови.
Тужбите се доставени до Управниот суд, а во нив се бара да се изврши вештачење, Министерството да ги презентира договорот и лиценцата за користење на софтверската апликација.
На социјално загрозените граѓани им е нејасно, како може согласно Методологијата за бодирање на кандидатите, дел од нив да не бидат, дури ниту на прелиминарната листа.
Инаку, за злоупотреба со социјалните станови денеска обвинија и од опозицискиот СДСМ. Од владејачката ВМРО-ДПМНЕ пак веднаш демантираа, објаснувајќи дека опозицијата сакала на грбот на ранливите групи на граѓани да добие само политички поени.