Со помош на хуманиот народ, малиот Ѓорѓи заминува на лекување во Турција!

by Fokus

За околу еден месец, со помош на хуманите граѓани кои донираа, собрани се потребните средства за лекување на малиот Ѓорѓи Трајков од Струмица. Три и пол – годишното момче, чија мајка Зорица ден пред новата година за ,,Фокус” раскажа со што се соочуваат поради неговата состојба, ја разбуди хуманоста на народот.

Имено, тој е роден со церебрална парализа и веќе добар дел од животот поминал на клиника, на разни терапии и операција која ќе му помогне да ги направи првите самостојни чекори. Сепак, и покрај извршената операција за отстранување на спазмите, која била изведена на клиника во Турција, потребна му била соодветна физикална терапија, која исто така се врши на клиника во Истанбул, а со цел да се подобрат неговите движења и да може да има што е можно посамостоен живот.

За потребната терапија семејството бараше 4.000 евра, а сумата се собра за неколку недели. Освен граѓаните кои што донираа на телефонските броеви за донации, многу хуманисти одржаа и разни настани во Струмица, со цел да помогнат во собирањето на финансиите.

-Напредокот на нашето дете зависи од хуманоста на народот и тешко ни е што сме принудени да бараме помош, но со една плата тешко се живее. Најголемата желба на Ѓорѓи е да игра фудбал, со милост ги гледа другите деца како играат, а бидејќи не може да оди, јас го придржувам со рацете додека тој со нозете се подава кон топката. Верувам дека со соодветната терапија ќе дојдат и резултатите, дека Ѓорѓи еден ден ќе може самостојно да се движи, па и да заигра фудбал – ни изјави неодамна мајката. Телефонските броеви за донации за Ѓорѓи веќе не се активни. Родителите информираат дека е собрана потребната сума за лекување и како наскоро ќе заминат на клиника во Турција. Се заблагодарија на јавноста за несебичната помош и за дадената можност да се подобри состојбата на нивното дете.

Поврзани новости