Судијката Јованка Спировска -Панева, а не судијата Нухи Рустеми, требало да го суди предметот во кој лидерот на ДУИ, Али Ахмети и Муса Џафери, го тужат Слободан Богоески за клевета и навреда, но поради „непослушност“, како што неофицијално дознава „Фокус“, таа била тргната од предметот.
Според информациите на „Фокус“, судијката Спировска- Панева одбила да ги почитува насоките кои наводно ги добила од претседателот на Основниот суд Скопје 2, Илир Сулејмани, поради што била сменета. За ваквите шпекулации одговор побаравме од претседателот на судот, одноно го прашавме дали е вистина дека и правел притисок на судијката, а кога не го послушала ја тргнал од предметот? Од судот ни одговорија дека претседателот никому не врши притисок и дека работи согласно законите.
-Не се точни информациите дека Претседателот вршел притисок врз судијата Панева како да постапува по конкретниот предмет, од причина што Претседателот на Судот при извршувањето на својата функција во целост ги почитува законските и подзаконските акти со кои е регулиран начинот и доменот на неговите овластувања како Претседател на Судот, ни одговорија од Основниот суд Скопје 2.
Сепак од таму не ни одговорија директно на прашањето дали овој предмет најпрвин бил распореден кај судијката Панева, туку не информираат дека од 2016 година е донесено одлука судијката Панева повеќе да не постапува по предметите за клевета и навреда.
-Имено, врз основа на член 39 и член 88 од Законот за судовите, како и врз основа на член 112 од Судскиот Деловник, секоја година кон крајот на тековната година се донесува Годишен распоред за работата на Судот за следната година. Така, на ден 25.12.2015 година е донесен Годишен распоред за работата на Основниот суд Скопје 2 Скопје за 2016 година, каде меѓудругото, во организациона смисла беше извршено прераспределување во зависност од потребите на Судот, а во насока на ефикасно вршење на судската дејност. Според член 91 став 1 од Законот за судовите, судовите во кои се основаат специјализирани судски оддели се распоредуваат судиите според нивната специјализација во правната област. Согласно наведениот член, како и имајќи предвид дека конкретниот судија и со Годишниот распоред за 2015 година, постапувала во Одделот за имотни спорови, истата со Годишниот распоред за 2016 година, останува повторно во истиот Оддел. Имено, со Годишниот распоред за 2016 година на Основниот суд Скопје 2 Скопје е определено по предметите за утврдување на граѓанска одговорност за навреда и клевета и надомест на штета да постапуваат двајца судии, ни одговорија од Граѓанскиот суд.
Обвинетиот во случајот, Богоевски, пак ни потврди дека предметот најпрвин бил во рацете на судијката Панева.
-Точна е вашата информација дека предметот требаше да го суди судијката Панева. Во предметот има насоки кои таа им ги дававала на тужителите, односно да достават дополнителни докази, бидејќи во спротивно им напишала дека ќе ја отфрли тужбата. Најверојатно увиделе дека не е погодна, па решиле да ја сменат, вели Богоевски.
Богоески во овој случај е обвинет за клевета поради неговото сведоштво за случувањата со „Маѓар телеком“. Изјавата што ја даде Богоески пред американската Комисија за хартии од вредност, како и пред окружниот суд во Њујорк во Македонија стана актуелна откако американскиот суд ја објави на својата интернет-страница, а македонските медиуми речиси интегрално ја пренесоа.
Според сведочењето на Богоески за Њујоршкиот суд, вкупно 7,5 милиони евра биле внесени во Македонија со службен владин автомобил за поткуп на тројца политичари, експремиер Владо Бучковски, Ахмети и Џафери.
Неговото образложение е дека согласно американското и македонското законодавство самата тужба за клевета не е дозволена, бидејќи тој изјавата од која Ахмети и Џафери се почуствувале наклеветени, односно дека во 2005 година двајцата примиле мито од 2,5 милиони евра, ја дал пред судот во Њујорк, како сведок во случајот „Маѓар Телеком“.
Богоевски потсети дека со поднесените тужби за клевета, на еден начин се врши негово заплашување и влијание, како сведок, што е казниво.
“Тужбата за клевета за исказ даден во судска потапка не е дозволена. Воедно, според американското законодавство, а и според членот 368-а од Кривичниот законик, казниво е влијанието врз сведоци во судска постапка. Целта е како ненадлежен суд да издејствува пресуда против мене, која би ја користеле да ја амортизираат мојата изјава во постапките што се водат во Њујоршкиот суд и во Обвинителството за организиран криминал во Македонија “, изјави Богоевски.
Тој објави документ од Комисијата за хартии од вредност на САД, кој го поткрепува неговото тврдење, односно дека не смее да одговара за изјава што ја дал во судски процес.
„Вашите изјави дадени за СЕЦ ќе бидат изнесени како доказ на судењето на 7 мај 2017 година во Њујорк. Вашите изјави беа дадени на барање на СЕЦ. Истите беа дадени под заклетва, како што се дава при барање на сведоштво под заклетва во САД. Исто така и адвокатите на тужените имаа можност накрсно да ве сослушаат. Тужените Штрауб, Балог и Морваи оспоруваа дека вашите изјави не можат да бидат соодветно прифатени како доказ во тужбата од страна на СЕЦ. Судијата Ричард Саливан ги сослуша аргументите на странките и го отфрли оспорувањето. На 11 август 2015 година судијата Саливан пресуди дека вашата изјава ќе биде прифатена како доказ на судењето“.
Понатаму, во писмото што го добил Богоевски од Комисијата за хартии од вредност на САД, пишува дека тој треба да биде соодветно заштитен поради дадената изјава, а не тужен.
Наредното рочиште е закажано за 27 јануари 2017 година, а според поднесената тужба, Ахмети како отштета бара 3 милиони евра, а Џафери 2,5 милиони евра.
В.В.