СДСМ и Алтернатива засега не откриваат детали од преговорите за засилувањето на парламентарното мнозинство со четворицата пратеници од албанската опозициска партија.
Единствено, од таму истакнуваат дека постигната е начелна согласност за влез на Алтернатива во Владата, додека министерските и други функции што треба да ги добие партијата допрва ќе се прецизираат и утврдат.
Според неофицијални информации од ДУИ, пак, партијата на Африм Гаши во преговорите со премиерот Зоран Заев бара вицепремиерско место, плус два ресори во конкуренција на министерствата за здравство, труд и социјала, земјоделство, култура и информатичко општество и администрација.
Покрај тоа, функционер на ДУИ посочува дека Гаши бара и директорски позиции во влијателни државни компании, како ЕСМ или поранешно ЕЛЕМ, МЕПСО, АД за изградба и стопанисување со станбен и деловен простор и др.
Инаку, договорот за распределба на министерските ресори и други функции, според најавите од СДСМ и Алтренатива, треба да биде постигнат до крајот на неделава.
В.С.