Со 13 гласа „за“ денеска Советот на општина Штип изгласа да почне постапката за распишување на референдум на кој граѓаните ќе се изјаснат за Стратегијата за интеграција на бегалци и странци 2017-2027 година.
За гласаа совениците од редовите на ВМРО-ДПМНЕ, а пред гласањето салата ја напуштија советниците од СДСМ.
Координаторот на советничката група Јане Миланов најави дека ќе поднесат кривична пријава против граѓанската иницијатива.
-Ќе поднесеме кривична пријава против подносителот на оваа граѓанска иницијатива, имајќи во предвид дека во овие собрани потписи фигурира и матичниот број на лицата, кој што според Законот за лични податоци е податок од највисок приоритет, а исто така на списокот има потписи и на малолетни лица, рече Миланов.
Граѓанската иницијатива „Будење“ од Штип до Советот на општината има приложено 356 потписи од граѓани кои ја поддржуваат иницијативата за референдумско изјаснување.