Се организираат туристички тури до домот на Атиџе по цена од 30 евра!

by fokus 13:39
13:39

Организирана пешачка тура до домот на Атиџе Муратова, ѕвездата од филмот ,,Медена земја”, од селото Дорфулија, до селото Бекрилија, каде пчеларката ги пречекува гостите со кафе, е актуелна во јавноста изминатиот период, а се реализира преку туристичката агенција ,,Enjoy Balkans” и нејзиниот челен човек, Александар.

Во разговор за ,,Фокус” тој појаснува дека замислата да се организираат туристички тури до домот на Атиџе била негова, со цел да се промовираат убавините во овој дел на земјава, но и да и се помогне финансиски на Муратова.

- Advertising -

-Дојдов до оваа интересна замисла, и стапив во контакт со Атиџе и со нејзиното семејство. Таа радосно прифати, се согласија и нејзините блиски. Веќе бевме групно во посета кај неа, задоволни се сите учесници во турата.
Можам да кажам дека речиси 90 проценти од заработката одат кај Муратова, јас работам без некој посебен финансиски бенефит, желба ми беше да придонесам за запознавање на природните убавини во овој регион, да се запознаат учесниците во турата со традицијата која владее овде, со секојдневниот живот на мештаните, да се запознаат со Атиџе.
Таа ги пречекува гостите со турско кафе, па им гледа и гата во филџан, се дружат со неа, знае и да им запее. Ги почитуваме мерките за заштита од Ковид-19, и понесуваме убави впечатоци од овој предел – вели туристичкиот водич.

Во турата наречена ,,Патот на Атиџе” се посетуваат Дорфулија, Кишино, Бекирлија, во Општина Лозово. Максимален број на учесници во турата биле 25 лица која започнувала во 8.30 часот, а завршувала истиот ден, околу 18 часот. Кај Атиџе посетата траела околу еден час.
Веќе се најавени следните две тури, за наредната сабота и недела.

-Планираме турите да се организираат до крајот на месец октомври. Убаво искуство е, Атиџе е задоволна, учесниците имаат позитивни впечатоци од целиот настан. Пакет аранжманите за турата се нудат и преку Групер, поради што добив некои негативни коментари и критики, па сакам да им порачам на сите дека нема место за политика овде. Целта е промоција на нашите природни богатства, и секако поддршка за Муратова – појаснува Александар.

Вики Клинчарова

Поврзани новости