Пред малку во Кривичниот суд се одложи главната расправа за судскиот случај „Пуч“, во кој меѓу обвинетите е и лидерот на СДСМ, Зоран Заев. Бидејќи на новинарите не им беше дозволено да влезат во судница, од судот не известија дека судењето се одлага поради неприсуство на еден од поротниците.
На одлагањето, во судницата, но и надвор од неа, реагираше и Заев но и специјалната обвинителка Катица Јанева, која на ова рочиште требаше да образложи дали останува на истото обвинение, или ќе има измени, бидејќи од неодамна овој случај од рацете на Обвинителството за организиран криминал, премина во рацете на Специјалното јавно обвинителство. Тие реагираа и на одлуката на судот, на главната расправа да не го повика единствениот предложен сведок од СЈО, екс премиерот Никола Груевски. Како што објасни Јанева, судијата рекол дека сметале дека сведокот не мора да присуствува на првото рочиште.
-Реагирав на одлуката на судот да не го повика мојот сведок Груевски. Исто така реагирам и за тоа што не ви беше дозволено на вас новинарите да влезете внатре. Се надевам дека ќе присуствувате на наредното рочиште, истакна Јанева.
По одложувањето на главната расправа, реагираше и Заев.
-Ова што денеска се случи во Кривичниот суд е доказ како ова институција се држи под контрола на власта. Судењето се одложи бидејќи судот не му доставил покана на Груевски, а за да го покрие неговото неприсуство, рекоа дека се разболел поротник, истакна Заев, кој додаде дека сепак верува дека ќе ја дочека правдата.
Наредното рочиште е закажано за 1 ноември, на што се побуни обвинителката Јанева, бидејќи според неа случајот непотребно се одоговлекува.
Во предметот „Пуч“, за неовластено прислушување се обвинети лидерот на СДСМ, Зоран Заев, Зоран Верушевски, поранешен прв човек на ДБК, неговата сопруга Соња Верушевска, Ѓорѓи Лазаревски, поранешен вработен во МВР и струмичанецот Бранко Палифров. Но, сега наместо обвинителот Златко Биковски, од Обвинителството за организиран криминал, обвинението го застапува специјалната обвинителка Јанева.
Поради видно изменетата состојба, се очекува новиот обвинител да постави и нови правила на игра, односно се очекува да искористи една од правните можности кои му се на располагање, да го повлече обвинението и да поднесе ново или да го редизејнира постоечкото, поточно за дел од обвинетите да го повлече обвинението, а на нивно место да гони нови обвинети. Токму втората варијанта е очекувана за правниците кои ги консултиравме.Тие појаснуваат дека очекувано е на обвинителна клупа наместо сега обвинетите да седнат функционери од власта, кои ќе го понесат товарот дека го организирале и реализирале неовластеното прислушување.
Според досегашното обвинение за „Пуч“, од 2010 година, па се до јануари 2015 година, вработениот во МВР, Звонко Костовски, кој во издвоена постапка се договори со обвинителството и прифати да оди три години во затвор, бил поттикнат од Верушевски и Лазаревски неовластено да слуша и прислушува телефонски разговори на владини функционери, но и членови на опозицијата. Наводно, Звонко прислушувал, и тоа цели четири години, па снимките му ги давал на Лазаревски, кој, пак, ги предавал на Верушевски. Тој, пак, според обвинението прибавувал тајни податоци и документи со намера да ги соопшти и предаде на странска држава, организација и лице кое им служи, а неговата сопруга ги преведувала на англиски јазик. Обвинетиот Заев, пак, ги искористил снимките за да го уцени и присили премиерот Груевски да формира техничка влада. Накратко, тоа според обвинителството е „гревот“ на обвинетите.