Саша Ковачевиќ ќе прави хуманитарен концерт за помош на наши деца!

by fokus

Големата балканска музичка ѕвезда Саша Ковачевиќ ќе одржи хуманитарен концерт во Прилеп, за помош на наши деца на кои им е потребно скапо лекување. Ова е најверојатно прв случај кога музичар од регионот прави хуманитарен концерт кај нас. Средствата кои ќе се соберат од концертот се наменети за Мартин Стојаноски и Дејан Најдоски.

Мартин е од струшкото село Дрслајца. Тој во тешка сообраќајна несреќа се здоби со тешки телесни повреди, поради кои сега се наоѓа во инвалидска количка. Средствата се потребни за лекување во Москва, Русија. Дејан е мало момче од Прилеп и има аутизам. За подобрување на неговата состојба треба да замине на лекување со матични клетки на клиника во Турција.

И за двете момчиња веќе извесен период се споделуваат апелите за помош на социјалните мрежи и на официјалната страница за донации.

Хуманитарниот концерт на Ковачевиќ ќе се одржи на 30. ноември во спортската сала „Сонце – ГА” во Прилеп, со почеток од 21 часот, а влезниците ќе се продаваат по цена од 200 денари. Музичарот го најави настанот и на својата официјална страница.

Неговата долгогодишна соработничка и дел од неговиот менаџерски тим за Македонија, Даниела Пантева – Пантиќ, за „Фокус” вели дека тоа што Саша е можеби единствениот пејач од регионот кој решил да прави хуманитарен концерт за наши деца, не е нешто од кое е изненадена. Раскажува дека за неговата хуманост и сочувствителност знаат најмногу неговите блиски, бидејќи многу често се вклучувал или иницирал слични настани и во соседна Србија.

-За Саша има премногу приказни каде ја покажал својата големина како човек, но тој е таков, не сака да се експонира, не сака да ги полни страниците на медиумите со своите гестови, туку секаде каде што е во можност помага без многу медиумска бука. Низа на концерти, настани каде дал поддршка, донации, се е тоа дел од неговиот пат. Да им служи за пример на останатите од регионот, кои пречесто ни гостуваат на општинските манифестации, а не се сетиле да направат барем еднаш во пет години некој хуманитарен концерт во нашата земја, или пак да донираат дел од хонорарот за некоја хумана цел кај нас – вели Пантева.

Ковачевиќ, кој е роден во Белград, првиот настап го имал на свои 16 години. Има завршено Академија на уметноста – насока за снимање и дизајн на звук. Заедно со брат му Раде има музичко студио. Важи за еден од најбараните пејачи во регионот и дијаспората.

Вики Клинчарова

Поврзани новости