Раскинат договорот за реконструкција на „Пелагонија“, се бара фирма која ќе ја заврши фасадата за 1 милион евра

by fokus 16:07
16:07

Град Скопје го раскина договорот со фирмата „ЛСГ Билдинг Солушнс“ за реконструкција и доградба на зградата Пелагонија која се наоѓа во близина на Триумфалната порта. Од Градот велат дека компанијата не го почитувала договорот и ги пробила роковите.

-Договорот е раскинат и е активирана банкарска гаранција. Финансиски средства за доизградба се обезбедени од буџетот на Градот, а наменски префрлени од државниот буџет со одлука на Владата – велат од кабинетот на градоначалникот, Коце Трајановски.

Довршувањето на фасадата ќе го чини Градот 1.143.602 евра. Веќе е распишан оглас на кој се бара поволна понуда, по што администрацијата на Трајановски треба да избере нова фирма која ќе го заврши проектот.

- Advertising -

Инаку, со ребаланс на буџетот беа скратени 30 милиони евра предвидени за објекти од проектот „Скопје 2014“, меѓу кои се и проектите за рефасадирање на згради во централното градско подрачје.

Зградата „Пелагонија“ доби барокно руво со одлука на Град Скопје, откако претходно била добиена согласност од станарите и сопствениците на деловните простори, рекоа од Градот. Сопственик на зградата е компанијата за производство на лекови, медицинска опрема и материјали „Д-р Пановски“.

Идејното решение за фасадата е на Лазар Димов и Никола Стакинов. Склучениот договор со „ЛСГ Билдинг Солушнс“ беше во вредност од 1,9 милини евра. Не се знае колку од предвидениот проект е изградено и колку уште останува да се изгради.

М.В.

Поврзани новости