Точно 770 пријавени натпреварувачи од 10 земји, меѓу кои македонската атлетска елита и актуелната балканска шампионка, викендов ја истрчаа Битола на првата градска трка Трчај бе, организирана од група ентузијасти кои решија Битола да стане град на трчачи.
– И се случи Трчај бе на Битола, успеавме да го организираме најмасовниот спортски настан кој некогаш Битола го имала. Би сакале настанот да ни прерасне во традиција за сите нас” – изјави директорот на трката Никола Димитровски, по професија адвокат и вљубеник во трчањето.
Тој заедно со група ентузијасти неколку месеци интензивно ја ширеа идејата дека и Битола треба да добие градска трка и да стане град во кој луѓето ќе се поттикнат да трчаат.
Пријавени беа поединци и тимови од многу комапнии, факултети, здруженија, семејни тимови кои направија вистински спортски празник за градот под Пелистер. Никогаш Битола не била толку раздвижена во недела наутро.
Трката се случи во истиот викенд во кој беше отварањето на Фестивалот на филмската камера Браќа Манаки, правејќи меѓусебна промоција и кампања “Трчај бе во Битола, за да трчаш потоа на филмски проекции”, при што секој учесник доби бесплатни билети за следење на филмскиот фестивал.
– Ова е амбициозен проект во кој влеговме ентузијастички. Она што радува е што буквално наидовме на отворени врати кај сите, добивме поддршка од неколку значајни македонски комапнии кои перпознаа идеја во која сакаат да инвестираат своја промоција и тим билдинг за своите вработени. Тоа значи дека целиот буџет е граден на спонзорства, што ја прави оваа манифестација самоодржлива. Логистички не подржаа и неколку јавни институции и бројни поединци нудејќи да се вклучат како волонтери – истакна Димитровски.
Трчај бе кампањата се водеше исклучително преку социјалните медиуми, инволвирајќи жители од Битола со цел да покаже дека “обичните” херои трчаат на Трчај бе. Во категорија 5к жени, првото место го освои Миљана Ристиќ (19 мин 51 сек), воторото Виолета Ивановиќ и третото Марија Пеликон, сите три од Македонија. Во категоријата на 5к трка на мажи, Кристијан Стојани (16 мин 43 сек) беше прв а по него, Наум Танески и Григоријан Никовски од Македонија.