Приведени се 343 лица на протестите одржани синоќа во повеќе градови во Турција поради апсењето на градоначалникот на Истанбул, Екрем Имамоглу, кој воедно е главен ривал на претседателот Реџеп Тајип Ердоган. Демонстрации се одржаа во десетина градови, вклучувајќи ги Истанбул и престолнината Анкара.
Турското МВР соопшти дека приведувањата се направени за да се спречат „нарушувања на јавниот ред“ и предупреди дека властите нема да толерираат хаос и провокации.
Демонстрациите започнаа во средата кога Имамоглу беше приведен под обвинение за корупција и помагање на терористичка група, заедно со уште 103 други осомничени. Тој се смета и за сигурен кандидат на главната опозициска Народна републиканска партија (НРП) за претседателските избори во 2028 година.
Опозициската партија НРП го оцени случајот како политички мотивиран и повика на мирни протести и покрај забраната на властите за одржување јавни собири.
Министерот за внатрешни работи Али Јерликаја и министерот за правда Јилмаз Тунч го осудија повикот за протести и го опишаа како неодговорен. Според министерот Јерликаја демонстрантите сакаат да го нарушат јавниот ред и да предизвикаат хаос.
Имамоглу, пак, ги пофали протестите за кои рече дека се насочени кон заштита на демократијата. Се очекува тој денеска да даде исказ во полицијата во Истанбул каде што е задржан од средата, а потоа да биде изведен пред суд.