Лука Висентини, генералниот секретар во Европската конференција на синдикати, денеска одржа состанок со Претседателот на ССМ, Дарко Димовски.
На средбата присуствуваа и Специјалниот советник на МКС, Јап Винен, Специјалниот советник на ЕКС, Јозев Нимиц и Раководител на секторот за човечки ресурси, Синеад Тиернен.
На состанокот, Висентини и советниците биле информирани за тековните активности на Сојузот на синдикатите на Македонија за донесување на нов Закон за работните односи, состојбата со Колективното преговарање и Социјалниот дијалог, активностите на ССМ за зголемување на минималната плата како и за активностите кои ги спроведуваат синдикатите здружени во ССМ за заштита и унапредување на работничките права.
Претседателот на ССМ, Дарко Димовски, истакна дека соработката со Европската и Светската конфедерација на синдикати е од исклучителна важност за ССМ и ваквата поддршка е показател дека сме на правиот пат.
-Присуството на високите претставници на ИТУЦ и ЕТУЦ и поддршката во нашите заложби се од исклучително значење за сите синдикати, да истраеме во нашите активности за унапредување на работно правното законодавство. Силата на синдикатите е во нивната бројност, обученост, оспособеност, но и во нивната солидарност, поддршка и заедничко делување не само во сопствените држави туку и на глобален план, рече Димовски.
Претседателот, Димовски истакна дека само така здружени можеме да ја постигнеме нашата заедничка цел во остварување и заштита на достоинството и човечките вредности.
Генералниот секретар на ЕКС, Лука Висентини искажа задоволство за можноста да бидат во Скопје и да покажат солидарност на Синдикатите во Државата. Го поздрави социјалниот дијалогот кој е во тек, но во исто време препорача да се задржат позитивните аспекти кои се дел од Законот и процесот да се искористи во насока да се зајакне социјалниот дијалог, да се унапреди процесот на колективно договарање и да се пополнат празнините кои се уште постојат во Законот за работните осноси со Европските директиви и Конвенциите на МОТ.