Неколку дена пред Нова година, односно на 27 декември, ќе биде изречена пресудата за случајот “Тарифа“, еден од предметите на поранешното Специјално јавно обвинителство, којшто сега е во надлежност на Јавното обвинителство.
Како што соопштија од Коалицијата Сите за правично судење, на денешното рочиште биле изведени завршните зборови на двајца бранители и обвинетите. Судот закажал објава на пресудата за на 27 декември во 10 часот.
Во случајот „Тарифа“ обвинет е поранешниот генерален директор на АД „ЕЛЕМ“ Дејан Бошковски и уште други две лица за противзаконска набавка на софтверски систем за потребите на државната компанија „Електрани на Македонија“ вреден околу четири милиони евра.
Според обвинителството, обвинетите ја злоупотребиле службената положба и овластувањето во постапка за јавна набавка на софтвер – „ЕРП систем“. Обвинетите со неизвршување на службената должност овозможиле правното лице – конзорциум, кое подоцна го добило тендерот, да се квалификува во втората фаза на преговарање при јавната набавка, иако немало доставено комплетна документација.