Од Обвинителството информираат дека е покрената дисциплинска постапка за обвинителките Вилма Русковска, Ивана Трајчева и Елизабета Јосифовска.
-Во согласност со член 93 од Законот за јавното обвинителство, Јавниот обвинител на Република Северна Македонија денеска поднесе предлог за поведување дисциплинска постапка за утврдување одговорност на тројца јавни обвинители, за кои постои сомнение дека намерно и неоправдано направиле крупна професионална грешка со што сториле тешка дисциплинска повреда од член 91 алинеа 6 од Законот за јавното обвинителство.
Во исто време, врз основа на член 81 од Законот за јавното обвинителство, Јавниот обвинител на Република Северна Македонија донесе Решение за оддалечување од функцијата за еден јавен обвинител додека трае кривичната постапка поведена по поднесена кривична пријава против наведениот обвинител, велат од Обвинителството.
Суспензијата се однесува на шефицата на Обвинителството за гонење на организиран криминал и корупција, Русковска.
Постапката е иницирана поради случајот со претресот во Управата за финансиска полиција.