Пандев доби нов тренер

Македонскиот фудбалски ас од редовите на Џенова, Горан Пандев доби нов стратег откако денеска Чезаре Прандели беше назначен за нов кормилар на тимот.

Поранешниот селектор на Италија ќе го одржи својот прв тренинг со својот нов тим попладнево, а претходно работеше во Ал Наср.

Под негово раководство, Италија освои сребрен медал на Еврото 2012. Џенова во четвртокот испадна од Купот на Италија, откако загуби од третолигашот Виртус Ентела по изведувањето на пенали.

Џенова доживеа дебакл на својот стадион „Луиџи Ферарис“ во натпревар од четвртото коло, а тренерот Иван Јуриќ беше сменет веднаш по мечот. Хрватот беше на чело на Џенова од 9 октомври оваа година, заменувајќи го Давиде Балардини.

По 11 кола во Серија „А“, Џенова е на 14 место на табелата.